哈哈廚房：Himalayan Salt Block 和牛,松茸,帶子之夜

見哈日米米係咁食牛我又想食，咁噚日見 San Jose Mitsuwa 見到D米國和牛 20% off，又好靓仔，真係唔買唔得囉～

松茸 Grade 1 又係 20% off，又要買～
咁... 買唔差在買埋帶子刺身啦...哈哈哈

摷返我舊喜馬拉雅山玫瑰鹽磚出嚟，整返個 Salt Block 之夜先！

我好鐘意呢舊 Salt Block 架，燒牛同海鮮最 Perfect !

記唔記得我好鐘意玫瑰鹽呢？

乜野調味都唔駛落，買舊靚牛買D靚海鮮，燒完淡淡嘅玫瑰鹽味，所有鮮味出晒嚟！

用呢D Salt Block 要好小心保養佢，唔係好快就要買過第二舊...

Salt Block 有分兩種，一種好似我呢舊咁 for cooking/serving 都得嘅。

另一種薄D，for serving 用嘅。

如果 for cooking, 一定起碼要有 2 吋厚... 1.5 都勉強可以但就可能快D裂。

所以都係 2 吋穩陣D啦～

如果 for serving 就薄D都得。放入冰格雪凍佢，serve 壽司，生果，雪糕，全部都會有陣好淡嘅鹽香味。

不過無論如何，記得千祈唔好浸水或用水喉沖佢呀，唔係好易裂。

用呢D Salt Block，有人會成舊放 oven, 但其實咁樣對舊 salt block 唔係太好，especially 頭幾次。所以用 stove top 就好D。咁，如果你堅持嘅話，我呢個 size 就放 oven 350F 5 min, 400F 10 min, 再 500F 20 min 啦。

我呢舊係 8" x 8" x 2"， stove top heating 先極細火 heat 佢 15 min，跟住中火 10 min，再大火 10min。如果大舊D就要 heat 耐D喇～

第一次 heat 會有D gee-gee-聲，好似裂裂地咁嘅聲。

呢個係正常嘅唔駛驚～

想知佢夠熱未可以洒幾滴水，如果 sa-sa- 聲好快就蒸發咗就代表 OK。
或者你可以放隻手喺舊磚 2-3 吋上面... 注意係 2-3 吋上面！！唔係就咁放上面呀！
咪燒熟自己隻手呀！

跟住就可以燒喇～～～

雪花和牛，正！

當然仲有松茸啦～

用 salt block 燒野食要留意，肉又好菜又好一定一定一定要抺乾身！
如果太濕就會咸死你！

仲有，記得咩都唔好醃呀 (黑胡椒 OK)，否則又係咸死你～

牛牛薄薄地，每邊燒約 5-8 秒就可以，靚牛梗係要 rare 啦！

( 如果燒厚身嘅牛扒但又想食熟D，
建議先用 pan 煎或 grill 一陣先再放 salt block 去 touch up 玫瑰鹽嘅香味。
如果你想食熟D就自然要燒耐D，因為牛扒本身有水份，燒得太耐又係咸死你～）

松茸就要耐D，因佢本身冇乜水份，唔怕會太咸。
燒耐D菇味出D，好食好多香好多！

帶子我買 sashimi grade 嘅，所以每面約 45 秒就啱晒我。

如果唔係 sashimi grade 就熟少少安全D啦～

仲記得我頭先話千祈唔好浸水或用水喉沖佢？

咁點洗呀？

呢舊野用完會熱幾個鐘，一定要等佢 completely cool down 先好清潔。

cool down 後用一塊濕濕地嘅布或sponge刷佢D漬。

如果燒過肉，你係唔會刷得走晒所有漬架喇。放棄啦～

刷得幾多得幾多 ( FYI 我用新嘅電動牙刷去刷嘅 )。

刷完就用 kitchen paper 抺返乾佢。再放陰涼乾爽嘅地方風乾。

第二日就可以放返入櫃。

記得唔好放潮濕嘅地方呀！

由於鹽本身有防菌特質，所以只要你抺得夠乾放得好好地就冇問題。